Tagged: drinks

0

【新界首間日式蛋料理餐廳 新推雲朵意粉+五式玉子燒】Tamago-EN

蛋!全部都係蛋!來自新加坡嘅日式蛋料理餐廳@Tamago-EN繼進駐旺角、北角之後,首間新界分店喺元朗開幕喇。除咗有生雞蛋拌飯、玉子串燒呢啲睇得又食得嘅招牌菜之外,最近更新推出4款雞蛋主題意粉,其中海蝦明太子醬冷意粉有成隻雲朵雞蛋鋪喺面,賣相即刻加晒分呀。快啲睇埋落去有咩正嘢啦! 元朗新店地方都夠晒寬敞,店面全部都以標誌性嘅雞蛋圖案做裝飾,非常易認。 先睇吓呢度必食嘅終極TKG生雞蛋拌飯(HKD39),招牌雲朵雞蛋鋪滿飯面,單睇賣相都好吸引啦。呢種生雞蛋拌飯雖然喺香港少有,但就係日本傳統嘅營養早餐,餐廳嚴選新鮮嘅沖繩雞蛋,將蛋白發打至蓬鬆狀態,食之前戳穿蛋黃,加入醬油、調味料撈嚟食,食落竟然一啲都唔單調,口感細滑富蛋香。除咗就咁食,仲可以加錢配醬漬三文魚、碎金鎗魚腩、牛油果等配料添。 5款特製玉子串燒(HKD68)都係呢度必食嘅蛋料理,蛋皮一層層咁捲,捲足4層先有呢個層次效果㗎。呢款玉子燒偏向關東口味,味道偏甜。上面仲有5款唔同口味嘅配料,包括親子三文魚、鱈魚子沙律、蟹肉、海藻醬同蕃茄仔。 特製TKP・海蝦明太子醬冷意粉(HKD92)係全新推出嘅意粉,得元朗同北角店有得食咋。呢款凍食嘅意粉面頭鋪上雲朵雞蛋,賣相搶眼。配上爽嫩嘅大蝦、明太子醬、沙律菜,配搭獨特,仲略帶梅子嘅酸酸甜甜,特別開胃! 另外推介埋呢款同樣新出嘅日式拿坡里義大利麵(HKD78),仲有盛載住半熟溫泉蛋嘅「雀巢」點綴。呢個「雀巢」係用幼麵炸成嘅麵餅,入口脆身。意粉以酸甜嘅蕃茄汁炒成,口味比較大眾化,大人小朋友都咁啱食㗎。 焦糖香桃梳乎厘班戟(HKD98)即叫即整,班戟面已經唧上焦糖,唔夠仲可以加埋旁邊嘅糖漿。微熱嘅班戟食落口感綿密,入口仍有梳乎厘嘅空氣感,配埋甜蜜嘅香桃同忌廉一齊食層次就更豐富喇。   たまご園 Tamago-EN 地址:元朗朗日路9號形點一期2060號舖 電話:2650 3335 營業時間:星期一至日:12:00-22:00

0

【旺角活化唐樓天台變茶室 三式和食×茶香班戟】蟲二

想搵個地方放空吓,旺角嘅蟲二就值得一去喇!呢間天台茶室最近就由百年唐樓活化嘅上海街618,打造成房內同戶外露天空間兼備嘅茶室。喺咁熱鬧嘅市區劃出寧靜一角享受中日料理,仲有兩款喺本店3rd Space人氣極高嘅茶香燒海鹽芝士麻糬班戟添。 蟲二呢個店名其實係指「風月無邊」,當「風月」去邊後就淨低「虫二」喇。雖然本店係上環普慶坊3rd Space嘅西式cafe,但呢度就主打中日料理,風格好唔同!日式擺盤融合中菜元素,室內有好多偏中國風嘅壁畫㗎。而cafe更設有露天空間,上嚟食嘢可以放鬆吓平日緊張嘅心情。 一汁三菜(HKD140/配熱茶)係呢度其中一款招牌料理,日式擺盤賣相好簡約別緻。成set有一款主菜、兩款漬物、慢煮蛋同柴魚湯。以漬物做配菜都落足心思,去皮車厘茄用咗杏脯汁醃製,仲有兩塊花蜜漬山藥添,夠晒特別。而個飯其實有兩種食法,除咗就咁配餸食之外,食到一半可以將慢煮蛋加入飯撈勻,再落柴魚湯當茶漬飯咁食。 三揀一嘅主菜就有赤味噌清酒燉豬肉、紅酒黑醋無花果燉牛肋粒同埋蘋果野菜咖喱日式雞肉,今次就試吓佢哋嘅燉牛肋粒啦!牛肋粒同蘿蔔都切成一口size,方便入口,而且都燉到非常軟腍,肉質有咬口又唔韌。個菜名有無花果,但搵唔到佢?原來無花果已經燉到融晒,令成道菜更加清甜,仲有淡淡無花果獨有嘅果香添! 3rd Space上環店嘅班戟咁出名,嚟到呢度梗係唔可以錯過啦!呢款伯爵茶傳統班戟(HKD85)並唔係梳乎厘班戟嚟嘅,而係比較有口感嘅厚身班戟,質感鬆軟有蛋香。賣點之一就係淋喺香蕉上面嘅海鹽芝士忌廉醬,炙燒後口感薄脆,味道微鹹,就好似濃稠版嘅芝士奶蓋咁,非常特別呀! 一切開原來內有乾坤!班戟中間夾住煙韌嘅伯爵綠茶味麻糬,配埋面頭嘅牛乳雪糕同芝士忌廉香蕉一齊食就夾晒喇! 想fresh啲可以試吓呢杯熱情果梳打(HKD55),入面嘅熱情果醬都係自家調配,酸甜度適中,飲落清爽開胃。 茶座嘅茶具都充滿日式簡約風格,好似香茅薄荷茶(HKD55)就用茶壺裝住上枱俾你慢慢斟嚟飲,唔驚啲茶凍得快。呢款聞落帶有淡淡薄荷香味,入口幾清新舒爽。   蟲二 地址:旺角上海街618號頂樓天台 電話:9220 9785 營業時間:星期一至日:12:00-22:00

0

【情人節精選8間西日葷素餐廳 浪漫晚餐×甜蜜下午茶】2020情人節

情人節食咩好?甜品下午茶、西餐、日本菜甚至自己煮都唔緊要,其實都係想同另一半過個溫馨浪漫嘅晚上啫。不如睇吓小編精選嘅8間餐廳邊間啱feel啦!   1. Camellia 想喺花海過情人節,可以去尖沙咀嘅Camellia喎。依家凡預訂即日至2月16日嘅紅寶石朱古力下午茶套餐(HKD398/2人),就會送你Too Faced螢光閃耀唇膏旅行妝一枝。喺粉紅玫瑰花牆嘅浪漫打卡環境,食住以紅寶石朱古力做主題嘅甜品,女朋友一定甜入心啦!   Camellia 地址:尖沙咀梳士巴利道18號Victoria Dockside K11 Musea 地下033號舖 電話:2885 2320 營業時間:星期一至五:12:00-22:00,星期六、星期日及公衆假期:11:00-22:30 2. Alibi – Wine Dine Be Social 今年日本嘅櫻花會早啲開,如果唔想外遊可以先食旺角香港康得思酒店Alibi – Wine Dine Be Social嘅「奇幻旅程下午茶: 東京賞櫻篇」(HKD488/2人)止癮,不過每日供應10份咋。呢份下午茶有清酒鮑魚伴海膽沙巴翁、三文魚伴紫蘇及柚子醬、燒汁手撕OBE草飼草牛肋骨法包、味噌黑鱈魚伴牛油果蓉同烤果仁香菇鹹批做惹味鹹點之外,仲有櫻花士多啤梨卷蛋、綠茶紅豆歌劇院蛋糕、黑芝麻意式奶凍、沖繩紫薯撻、傳統英式焗鬆餅伴奶油忌廉及焙茶蘋果醬做甜品,款式夠晒豐富;配埋兩杯「櫻花綻放」雞尾酒同免費令枱一隻嘅「PAPINEE小貓菲利思動物玩偶」,仲唔係又食又拎?! 「奇幻旅程下午茶: 東京賞櫻篇」 供應日期:即日至3月31日 供應時間:15:00-17:30...

0

【世界級得獎餅店今日開業 趣致甜品大玩港式主題】當文歷餅店by Dominique Ansel

甜品控注意!掀起甜品界熱話嘅紐約得獎名店Dominique Ansel Bakery強勢登陸香港喇,今日終於喺海港城正式開業,新店以Dominique嘅廣東話譯音命名為當文歷餅店。而榮獲世界50大「最佳甜點主廚」嘅Dominique Ansel,除咗帶嚟全球熱賣嘅招牌法式酥點外,更為香港店度身訂造一系列創意滿分嘅港式主題甜品。即刻睇吓新店點樣衝擊我哋嘅想像啦! 主廚Dominique Ansel特意為香港店設計一系列港式主題嘅創意甜品,全部都係香港限定,玩味十足添!部分蛋糕除咗以件裝發售,仲可以原個買走,以後節日慶祝都可以嚟揀返個喇。 呢款菠蘿包(HKD65/件裝;HKD520/原個)造型嘅椰子熱情果蛋糕,設計靈感當然係來自港式菠蘿油啦!用咗椰子慕絲同椰子味蛋糕整成菠蘿包嘅形狀,中間就以海鹽味忌廉同菠蘿青檸熱情果果醬扮牛油,賣相非常趣緻。 而紙包檸檬茶(HKD62/件裝;HKD480/原個)就連包裝盒都食得!呢款伯爵茶佛手柑蛋糕,外層用白朱古力整成,內層就係伯爵茶馬斯卡彭忌廉mix佛手柑奶酪、杏仁餅同脆片餅乾,食落茶味夠晒濃喎。 名為火腿通(HKD58/件裝)嘅芝士蛋糕以放大版通心粉造型出現,蛋糕用咗兩款芝士再加入檸檬整成,入口清新唔膩。加埋以白朱古力整嘅「火腿絲」、「青豆粒」同「紅蘿蔔棉花糖」做點綴,特製嘅火腿通就出世喇! 呢個罐裝黑白淡奶(HKD65/件裝)係咪好得意呢?其實佢係海鹽焦糖牛奶布甸嚟,海鹽焦糖味嘅奶凍入面有以冧酒浸過嘅蛋糕,層次好豐富㗎。 呢粒皮蛋(HKD58/件裝)其實係榛子咖啡撻,兩片蛋形嘅朱古力忌廉曲奇夾住牛奶朱古力慕絲同烤榛子忌廉,中間嘅「蛋黃」就用咖啡同黑芝麻味嘅啫喱整成,又幾有創意喎! 除咗港式創意甜品之外,餅店亦會賣各式現焗傳統法式酥點,包括全球最熱賣嘅招牌酥點DKA (Dominique’s Kouign Amann)。主廚Dominique更即場示範呢款DKA係點整嘅添。 DKA (Dominique’s Kouign Amann)(HKD38)係主廚以法國經典麵包Kouign Amann為基礎嘅改良版本。每件DKA都疊咗三層酥皮捏成,經烤焗後令外層焦糖化,相當脆身;入面就特別鬆化,食落仲有焦糖混合牛油嘅濃重香味,「全球最熱賣嘅招牌酥點」呢個名真係唔係浪得虛名! 另外,新鮮即製嘅仲有呢款魚蛋(HKD68),佢嘅真身原來係炸紅豆雪糕糯米糍!面頭灑上糖粉,再用火槍將佢燒到焦脆。食落去外熱內冷,簡直係冰火交融呀。 冬天凍冰冰梗係諗起充滿港式風味嘅炒栗子啦,呢度都有得食喎。每包8粒嘅栗子蓉瑪德蓮蛋糕設計成炒栗子(HKD68)造型,啡色嘅蛋糕仔用紙袋裝住,望落真係好似一粒粒嘅栗子咁。鬆軟嘅瑪德蓮蛋糕內係濃稠嘅栗子蓉,喺豐富嘅蛋香中滲透出陣陣栗子嘅清甜,而且每包都即叫即焗,保證新鮮熱辣! 想將呢啲嘢食同朋友開心share?餅店仲好貼心咁提供埋禮盒裝俾你買走!依家有DKA四件禮盒裝(HKD168)同港式奶茶曲奇杯禮盒裝(HKD108),唔知嚟緊仲會有邊款新禮盒推出呢?   當文歷餅店by Dominique Ansel 地址:尖沙咀海港城海運大廈地下63A號舖 電話:2613 8618 營業時間:星期一至四:08:00-21:00,星期五:08:00-21:30,星期六、日:09:00-22:00 開業日期:1月7日(今日) 12:00

0

【新藝術咖啡館×村上隆展品 自由打印咖啡配精緻輕食】CURATOR

講到生活藝術又點少得咖啡同美食呢?下星期一喺K11 Musea正式開業嘅藝術咖啡館CURATOR正正將兩者同藝術結合,最大賣點就梗係藝術打印咖啡啦!可以俾客人將自己鍾意嘅相列印喺咖啡面,夠晒獨一無二。店內亦提供一系列靚到藝術品咁嘅多士輕食、意粉主菜。所以話藝術館都唔一定好嚴肅嘅,喺度chill住歎咖啡、美食,一邊欣賞村上隆等藝術品都得啫! 主張「藝術融入生活」嘅CURATOR店面簡潔,店內會展出村上隆、草間彌生等藝術家嘅作品,而且仲會不定期更新咖啡館入面嘅藝術品,令客人有新鮮感。而另一邊就係開放式嘅Coffee Corner同廚房,客人可以望到咖啡師沖製咖啡。 話明咖啡都係藝術嘅一種,就由咖啡沖煮開始講起啦。咖啡館引入咗全港獨家嘅得獎咖啡機Aremde NEXUS one,打破傳統咖啡機封閉式嘅設計,等你可以直接欣賞到咖啡沖製嘅過程。 呢度仲有一大賣點係呢款藝術打印咖啡 (HKD88),連梵高嘅畫作《星夜》都印到喺咖啡面嘅忌廉,仲打印得幾仔細添。除咗呢幅名畫之外,呢部獨有嘅Coffee Printing Machine仲可以印到唔同類型嘅圖片㗎。只要客人提供相俾咖啡師,就可以印出屬於自己又獨一無二嘅藝術咖啡喇。 呢款斯人若彩虹,遇見方知有(HKD128)聽個名咁有詩意,其實佢就係賣相非常精緻嘅鮮果多士。喺脆卜卜嘅多士上面鋪滿士多啤梨、棉花糖、食用花瓣,再加朱古力榛子醬。望住咁靚嘅多士,食都食得開心啲啦。 想食啲健康輕食,可以試吓呢度嘅烤蝦牛油果沙律(HKD138)。將牛油果切成一片片鋪喺沙律菜上面,配埋粟米片、青瓜、蕃茄仔等配料,拌入墨西哥辣檸檬汁,感覺好清新。上面擺咗兩隻剝咗殻嘅大蝦,蝦肉爽滑彈牙。 小編大推呢款以黃油烤蝦配蕃茄醬炒意粉嘅大蝦意粉(HKD188)!面頭灑上巴馬臣芝士粉,食落酸酸甜甜好開胃,意粉質地就偏硬身。 除咗咖啡之外,呢度仲有好多飲品選擇。茶飲可以揀呢款雪橙冰紅茶(HKD78),就咁睇個外型已經好有特色。上面較細嘅壺沖緊帶有果香嘅熱紅茶,上枱後俾客人自己將茶倒入下面放滿冰塊嘅壺入面,可以依照自己嘅口味調教茶嘅濃淡度,然後倒落旁邊個杯度慢慢品嚐喇。   CURATOR 地址:尖沙咀梳士巴利道18號K11 MUSEA B1樓B113C號舖 電話:待定 營業時間:待定 開業日期:10月7日

0

【新派健康果飲杯杯靚色 自創極濃乳酪奶蓋零負擔】輕時光

慣咗飲台式飲品,又嫌佢唔多健康?依家有另一個健康又好飲嘅新選擇喇!呢間輕時光主打一系列健康鮮果飲品,強調低脂少糖亦堅持唔落糖漿,而用自家即日熬煮嘅桂花蜜,希望好飲得嚟,仲可以兼顧埋健康添。店主話有一次去泰國旅行見到當地好盛行呢種健康果飲,又發覺香港比較少同類型嘅飲品店,於是好想由自己做起,將呢種風氣帶嚟香港咁話。唔好睇啲飲品顏色咁豐富咁鮮艷以為加咗色素呀,其實全部來自水果嘅天然顏色,冇加任何香精同色素㗎!店主寧願製作成本高啲,都堅持用最新鮮嘅食材去保持飲品質素。咁健康,睇吓有咩咁特別先! 飲品店開喺天后,位置都幾容易搵,店面擺滿好多綠色植物,店內嘅裝修就以白色為主,用木牌做Menu掛喺牆上面,感覺好自然悠閒。舖位細細,一望就見到開放式水吧,可以睇住成個製作過程。轉角位仲有一張微型小長吧枱仔俾客人好chill咁坐低飲嘢,名副其實好似店嘅英文名咁”Take Your Time”! 介紹吓咁Colorful嘅鮮果特飲先,呢杯咁搶眼嘅紅火龍優格果昔(HKD32)用紅肉火龍果加雪白乳酪同鮮奶嚟打呢個果昔,咁有層次嘅紅白配搭,淨係賣相都加晒分啦!選用紅肉火龍果除咗顏色吸引,營養價值更高,成杯飲晒都輕鬆冇負擔啦! 超級水果茶(HKD32)概念來自水果杯,想做到成杯都充滿新鮮水果,再配上清茶,飲落更加fresh。叫得「超級」水果茶,原因係超級大杯呀,水果嘅種類同一般嘅水果茶差唔多,但就比較重熱情果味,好有果香,解渴一流! 平時飲奶蓋飲得多,未試過飲乳酪整嘅奶蓋。呢杯芒果優格蓋茶 (HKD34)嘅特別之處係面頭嘅「奶蓋」同坊間嘅奶蓋唔同,係舖頭自創嘅乳酪奶蓋,以低脂乳酪打成,有好濃嘅乳酪味道之外,仲有奶香,同咁清新嘅芒果味好夾,又冇平時啲奶蓋咁膩;茶嘅部分就將芒果肉打喺茶入面,所以成杯茶嘅芒果味都好出,仲會食到啲果肉添。 紅火龍乳酸(HKD26)一到手有兩層,上面有好鮮艷嘅桃紅色係攪拌咗嘅火龍果肉,下面就係乳酸。本來以為火龍果同乳酸嘅味應該唔多夾,點知攪勻咗嚟飲又幾Match噃,仲好有新鮮感。 除咗鮮果系列,仲有啱晒抹茶控嘅抹茶Oreo。時光(HKD28),先調好非常濃郁嘅抹茶再撞入鮮奶,營造漸層嘅效果,望住杯飲品都夠晒療癒;面頭仲放咗好多Oreo餅碎,咬落會有啲咬口。幾時都話,抹茶加鮮奶呢個組合真係冇得輸,依家咁嘅天氣仲可以揀暖笠笠嘅熱飲,一樣咁好飲㗎!   輕時光 地址:天后電氣道83號利景閣地下1號舖 電話:5116 6865 營業時間:星期一至日:11:00-21:00

0

【尖沙咀小清新花系café 夢幻鮮花菜式打卡必去】Séan CAFE

尖沙咀最近有間新開嘅花系咖啡店Séan CAFE,由一位任教特殊學校嘅Miss開嘅,café仲用咗鮮花做主題,由店內裝修、擺設到食物賣相都充滿視覺享受。鮮花背後,原來店主係受到一個鍾意咬花瓣嘅自閉症學生所啟發,先至開始研究唔同嘅鮮花,了解埋花嘅食用價值。小編知道店主仲會安排佢嘅學生喺咖啡店度幫手,希望可以教多樣技能俾學生們。咁有愛嘅咖啡店,食物味道又點呢? 餐廳環境以淺色為主,配合café嘅主題,有唔少花嘅裝飾,啱晒鍾意小清新嘅朋友仔。 梗係要試吓咖啡出品先啦!呢杯玫瑰咖啡(HKD42)面頭放咗啲食用花瓣做點綴,飲到淡淡嘅玫瑰味。店主對咖啡品質都幾講究,選用指定嘅埃塞俄比亞咖啡豆,咖啡顏色比較淺,入口特別醇厚。 小編特別推介呢款新出嘅婺源皇菊花茶(HKD48),透明茶壺入面見到嘅婺源皇菊花個Size比平時飲開嘅菊花大好多,好似盛開緊嘅鮮花一樣,就咁望住已經覺得好放鬆。呢個菊花茶有兩個飲法,就咁飲已經好清香,有少少紅棗杞子味,又唔會太濃郁,好啱小編口味。可以隨自己喜好加入蜜糖,加咗蜜糖嘅花茶又有另一種感覺,冬天飲夠晒滋潤! 主菜其實都幾多選擇,好似玫瑰花忌廉汁海蝦意大利燉飯(HKD128) 用咗白汁加入玫瑰花去煮汁底,再加入野菌去煮意大利飯,食落會有淡淡嘅玫瑰香味,竟然幾夾到咁濃郁嘅忌廉白汁,可以令燉飯冇咁膩;飯上面嘅大海蝦就先浸咗玫瑰花水再煎香,海蝦夠大隻,肉質意外地爽口。由於海蝦同飯係分開煮嘅,所以即使對蝦有敏感嘅朋友仔仍然可以食到個燉飯,認真細心吖! 和風玉子黑豚肉漢堡扒竹炭漢堡(HKD68)入面嘅漢堡扒係有流心芝士㗎,食落幾juicy !平時食親嘅漢堡通常會配煎蛋或者炒蛋,而呢個竹炭漢堡就配咗香煎玉子,係餐廳嘅fusion菜。 小編見到玫瑰班戟(HKD78)個賣相即刻心心眼,餐廳採用法國嘅玫瑰花,顏色更粉紅,用佢嚟打卡真係一流!班戟嘅蛋漿裡面有加入食用玫瑰花瓣,但就咁食個班戟,味道就普通咗啲,不過蘸埋旁邊嘅玫瑰蜜就多咗陣花香,坊間比較少食到呢種口味呢!雖然甜品嘅製作時間比較長,要等大概15-20分鐘左右,但只要早少少落單,同朋友邊食邊傾邊等都好快過啫! 抹茶班戟配香草雪糕(HKD118)用咗宇治抹茶粉,會有回甘嘅抹茶味,而且唔會好甜,配埋雪糕食就啱啱好喇! 有教家政科嘅Fiona修讀過西廚課程,依家亦有讀咖啡相關課程,咖啡店大部分嘅菜式都係佢親自設計。為咗確保食物質素,Fiona幾乎每日放學之後都會到舖頭坐鎮。小編當日食到嘅甜品就係佢親自炮製喇,見到Fiona連對花瓣嘅擺盤都非常講究,就知佢要求高啦!   Séan CAFE 地址:尖沙咀漆咸道南29-31號溫莎大廈地下12A號舖 電話:6676 9679 營業時間:星期一至六:11:30-23:00,星期日:11:30-18:00

0

【觀塘新開零食店加購優惠 1蚊特別版可樂搶手零食區】平霸

觀塘呢間新開嘅零食店零食到家,喺開實體店之前,網店已經運作咗一段長時間,仲儲落大批零食迷嘅支持添。除咗有好多平價嘅特色零食之外,最近仲做緊1蚊零食加購優惠添,而且買滿100蚊仲有95折。吸引到平霸上門,睇吓佢啲零食係咪真係咁平先! 舖頭唔算大,左右兩邊都排滿零食,中間擺咗一列貨架,感覺零食嘅款式算幾多,有唔少零食喺出面真係冇乜見過。一入門口行前就見到個放滿各式飲品嘅雪櫃,舖頭賣嘅嘢,由零食、杯麵、禮盒、飲品到酒類都有,幾齊全。 各款特別版可口可樂(單價HKD13.9)個包裝真係好靚,買返去儲都抵吖。依家買夠HKD138,仲可以用1蚊加購。 1蚊加購嘅零食唔只係特別版可樂,選擇仲有好多。不過記得1蚊加購嘅零食成日都會唔同㗎,有興趣嘅朋友仔可以留意住佢哋嘅專頁喇。 有冇人同平霸一樣都好鍾意呢款黃金濃湯粟米球(HKD2.8)呢?但係成日開咗一大包又食唔晒,而呢款細細包有得食嚟過吓口癮就啱啱好,咁平真係買多幾包都唔心痛吖! 8蚊都唔使就買到大包裝嘅粟一燒(HKD7.9),好多零食店都做唔到呢個價錢。 韓國魚乾50片裝(HKD88),呢款魚乾平霸去韓國旅行都好鍾意買返嚟食㗎,喺韓國買嘅價錢同呢度都係差唔多咋,以後唔使喺韓國抬返嚟,喺呢度買咪得! 細細個成日食嘅芥辣味太郎魚柳60片(HKD58),芥辣味又係冇得輸,依家可以一大盒咁買返去慢慢回味喇,除返1塊都唔使1蚊。 返工返到攰,真係要買定幾罐咖啡喺office看吓門口。各款咖啡(HKD4.5)都係一個平價嘅選擇。   平霸小評:今次平霸精選咗啲自己覺得幾抵嘅零食同大家分享,雖然唔係話平得好誇張,但勝在零食款夠特色又多優惠。如果就咁買幾件過吓零食癮,單價都算係親民㗎喇,但係諗住間唔中入吓貨,一次過掃多啲嘅話,加埋唔同嘅折扣同優恵就夠晒平喇,慳慳埋埋可以掃多幾款零食!除咗以上推介嘅零食,平霸仲見到唔少好食又好玩嘅禮盒都好吸引,價錢仲比乜乜物語平一大截添,嚟緊聖誕新年買嚟送禮又多一個選擇,零食迷快啲去尋寶啦!   零食到家 地址:觀塘開源道54號豐利中心2樓208室 電話:3704 7878 營業時間:星期一至五:11:00-19:30,星期六至日:12:30-17:00

0

【2018世界盃你ready未? 精選3大睇波蒲點】RED MR、PONG、Centre Street Bar

世界盃聽日就開鑼喇,各位球迷ready好未呢?4年一度嘅盛事就梗係要約埋班最佳損友一齊high爆佢啦,小編依家就為大家介紹以下3間可以舒舒服服睇波嘅熱點啦! 星級睇波派對 RED MR 講起RED MR可能大家淨係會諗起唱K,但其實K場睇波一啲都唔失禮㗎,你睇吓灣仔RED MR嘅TONNO DELUXE,成個場大到可以踢埋波咁滯呀!另外佢個超大LED電視真係超啱睇波,有冇越位邊個球員詐死都睇得一清二楚呀! 除咗有超大銀幕之外,場內仲有波枱同埋長bar枱俾大家消磨睇開場嘅時間,個場咁大,搞個50-60人party都冇問題呀! 6月15號RED MR仲有個星級嘅直播睇波派對,主持有阿Bob同大埔Lulu等等,氣氛應該唔錯喎!入場費HKD180,包2支啤酒,小編覺得價錢算幾合理嘅!有波睇有酒飲又有星睇! 另外喺世界盃賽事進行期間,RED MR有個睇波套餐(HKD98),包指定啤酒或無酒精飲品2杯,或者指定啤油或無酒精飲品1杯+一份小食。呢個offer ok喎,平平哋有得同班波友睇吓波吹吓水,得閒仲可以唱返2首歌,好似唔錯喎。都係嗰句,快啲book定喇,尤其係決賽周呀,好快冇位㗎! RED MR紅人派對(灣仔分店) 地址:灣仔杜老誌道5號2樓 電話:3125 3333 營業時間:星期一至日:12:00-06:00   掃埋紀念品 PONG 如果大家鍾意玩Beer pong嘅話應該對PONG唔陌生,佢係銅鑼灣耀華街嘅樓上BAR,個場亦夠闊落,一路睇波仲可以玩吓波,過吓手癮。 一大班男人話去睇波呢,多數都係落吧睇㗎喇,氣氛同喺屋企睇完全唔一樣嘅。PONG喺6月15日亦為世界盃開鑼準備咗活動同埋紀念品,同時佢哋亦推出咗世界盃期間限定嘅menu,分別有代表德國嘅鹹豬手、英國嘅 Fish and Chips、墨西哥脆片、同埋法國嘅French Fries!一路食住異國風情嘅小食飲住酒睇波係爽嘅,同埋15號係Happy Friday嚟㗎!玩幾夜都唔驚啦!  世界盃期間喺PONG嘅任何消費都可以得到紋身貼紙同埋膠手帶,仲可以再參加遊戲贏其他豐富獎品,想知詳情記住留意PONG嘅官方專頁喇! PONG 地址:銅鑼灣耀華街38號 Zing!...

0

【台灣殿堂級珍奶襲港 黑糖波霸厚鮮奶超邪惡】老虎堂

依家珍珠奶茶店幾乎開到好似7仔咁,梗有一間喺你左近,尤其過江龍開完一間又一間!大家都知台灣盛產黑糖乜乜乜,不過喺台灣夜市見得多嘅黑糖波霸就一直喺香港唔多見,今次以黑糖波霸厚鮮奶打出名堂嘅台灣珍奶名店-老虎堂正式喺香港插旗,第一間分店就選址喺旺區銅鑼灣! 同一眾珍珠奶茶店一樣,老虎堂係純外賣店,舖頭細細咁。小編採訪當日仍未正式營業,但唔少人行過都已經好心急咁問「係咪開咗喇?」、「有咩揀?」咁樣,到咗上星期六正式開店以来,更加係日日大排長龍!依家就等小編介紹吓佢哋嘅招牌飲品有啲咩啦! 虎虎生風厚鮮奶(含奶霜/波霸+珍珠)(HKD30)老虎堂之所以叫老虎堂,其實就係因為佢呢杯招牌飲品,利用獨家虎式炒黑糖再混合波霸同珍珠,加入純鮮奶製作咗呢種signature嘅「虎紋」效果。獨一無二嘅黑糖虎紋好吸引呀!未飲已經想像到濃郁嘅黑糖口味,不過飲品攞到手都唔好咁心急即刻插飲管呀,睇埋個「飲用教學」先啦! 由於老虎堂嘅珍奶同一般珍珠奶茶店嘅手搖式製作方法唔一樣,佢哋飲品嘅重點係現煮嘅黑糖波霸,而沉底嘅黑糖波霸需要大家上下搖晃15下(係杯嘢搖咋唔係你個人啊!)。因為現煮嘅波霸係熱嘅,口感較軟,所以要同頂層嘅冰塊同厚鮮奶搖勻先會有Q彈Q彈嘅口感啊!飲落口首先會飲到超濃郁嘅厚鮮奶,外加黑糖甜而不膩嘅香味,真係好正呀!唔係糖漿嗰種死甜,而係慢慢喺口中融化嘅甜味,黑糖波霸+厚鮮奶配搭真係一絕!留意返,因為黑糖同波霸珍珠係一齊炒嘅,所以就做唔到少甜喇!同埋因為要有足夠冰塊令波霸珍珠能夠降溫至Q彈口感,所以都係冇得少冰㗎!放心,冰塊嘅分量係經過悉心量度過嘅,唔多唔少啱啱好! 老虎堂嘅大size珍珠叫做波霸,而細size先叫做珍珠!大家可以揀兩款混合或者純波霸或純珍珠,其實小編就覺得兩款mix埋係最好飲嘅,咬落口有唔同層次,好QQ呀! 另外如果大家都係心思思想飲吓奶茶嘅話,可以試吓呢款紅茶拿鐵(HKD24),唔鍾意太甜嘅朋友可以叫店員去甜或半甜;另外可以外加黑糖波霸/珍珠(+HKD3)㗎!雖然係拿鐵但唔會太甜膩,黑糖味依然係好清香! 呢兩款就好適合行街行到就熱死嘅時候救急用喇!有時想飲嘢但又可能啱啱食完飯,唔想飲奶咁heavy嘅話可以試吓醇紅茶(HKD19)[左]或者醇綠茶(HKD19)[右],同樣係用黑糖製造甜味,亦可以選半甜或走甜,亦都可以加3蚊要波霸或珍珠!紅綠茶味道好fresh好清新,黑糖味濃,唔係嗰種台灣嘅古早味,而係一陣清新嘅黑糖香,夏天飲夠晒解暑喇! 作為台灣過江龍店,老虎堂都真係有位台灣負責人坐陣㗎!呢位就係台灣店長Joy,因為長期喺香港工作,佢嘅廣東話都唔錯㗎!試吓店長手勢啦! 地址:銅鑼灣渣甸街36號 電話:2614 1717 營業時間:星期一至日:11:00-22:00