Tagged: #finedining

0

【本地星級大廚八道盛宴 鮑魚和牛炮製限定餐牌 】Test Kitchen×Butler

間唔中想食餐好?依家機會嚟喇!Test Kitchen同Butler聯手推出一連三日嘅八道菜晚宴以「追憶・尋回最初的味道」為主題,兩位大廚親自炮製八道精緻好味又有故事性嘅菜式,啱晒識食嘅你啦。一次過食到用多款矜貴食材,究竟將鮑魚、鵝肝、M7和牛等整成咩菜式?小編喺度率先同大家介紹其中幾道菜先! 炮製今次盛宴嘅兩位本地星級大廚原來都大有來頭㗎,Test Kitchen主廚Devon Hou(圖左)入廚15年,已經喺唔同嘅米芝蓮星級餐廳任廚,尤其擅長於西班牙菜。而Butler大廚Ray Choi(圖右)同樣有十多年入廚經驗,曾到訪日本大阪嘅La Cime學藝,所整嘅料理充滿個人風格。 平時食香煎鵝肝通常都會好油膩,但呢道鰹魚配鵝肝就唔同喇,除咗將鵝肝煎香,更加入鰹魚、意大利五花肉湯;配合酸瓜同日本生薑,減退油膩感仲增加味道層次添。 杏鮑菇雞肉配鮑魚呢道菜式集三種和而不同嘅口感,加上魚肝醬,令成道菜嘅鮮味更加提升呀! 清淡嘅娃娃菜都可以做主角?呢款紅椒堅果醬配娃娃菜喺娃娃菜加上鹹檸醋同杏仁碎,配合自家製西班牙紅椒堅果醬,兩者味道相輔相成又醒胃。 以「雙蝦」炮製嘅意大利餃子自然鮮味十足啦!餃子加入紅蝦之外,再以日本櫻花蝦、羅勒油提味。 Fine dining又點少得精緻嘅甜品呢?其中一款就係茶味蕨餅配麵包雪糕,加入脆皮酥嘅麵包雪糕同蕨餅,質感豐富。另外,仲有蔥油帶子同黑蒜M7都一樣好惹味㗎,想試就咪錯過今次嘅限定menu喇!   “If We were in Charge”盛宴 地址:西環西營盤干諾道西 158A 號地下3號舖 舉辦時間:2020年2月27-29日 19:00 / 20:30 價錢:HKD1180/八道菜 (HKD480配搭紅白餐酒;HKD380配搭非酒精飲品) 購買門票:https://www.testkitchen.com.hk/devonray  

0

【親民價法國餐 一次食齊三款主菜】Le Cleret Brasserie

法國菜要慢慢歎,fine dining就最啱,一邊飲酒一邊品嘗唔同嘅精緻菜式。喺中環IFC對面有間小店Le Cleret Brasserie,除咗主打中價法國菜,仲有輕量Healthy & Light同素食嘅Vegetarian Menu,俾大家多啲選擇。 呢度仲有自家法國酒莊Le Cleret 出品嘅紅酒,酒莊有幾百年歷史添。 晚餐Tasting Menu(HKD428/位)已經有五款食物同甜品,會因應時令食材設計菜式,依家就以菇菌類為主。嚟緊主菜會加多兩款菜式,可以五選三添。 法國餐一般先食前菜再飲湯,香煎加拿大帶子伴魚子醬,大大粒嘅北海道刺身帶子比一般帶子大粒,肉質腍得嚟又幾彈口,煎到七成熟,香口又保持到肉質嫩滑。醬汁少少酸味味,幾開胃,配堆仿魚子醬同沙律菜就更加清新。 即煮嘅黑松露野菌湯用咗秀珍菇、白菌、牛肝菌、洋蔥同薯仔煮成,每啖都充滿菇蓉!加埋幾滴黑松露油就更香,亦帶出菇嘅甜味。 今期主菜以法國主打食物做膽,一次過試三款菜式:香煎鵝肝有機五穀飯、喜禧慢煮有機啤酒雞同香烤澳洲牛柳。大廚話咁樣擺盤靚啲,但應先由淡味嘅雞開始食,再到牛柳同鵝肝。 雞肉一入口就食到啤酒味,同清甜嘅新鮮薯蓉好夾。牛柳肉味濃郁,裡面仲係紅紅嫩嫩,配雜菌可以減輕滯嘅感覺。鵝肝表面煎到外面脆,內裡creamy,配雜菌意大利飯一齊食都唔會太膩。 自家製嘅特選甜品係傳統杯裝Tiramisu,入面有層又厚又鬆軟嘅蛋糕,有啲似梳乎厘嘅質感。咖啡味唔會太濃,食完感覺好清爽,一啲都唔滯。 如果想試高級啲嘅菜式,可以揀Deluxe Tasting Menu(HKD628),會有松葉蟹同龍蝦薄片㗎。   Le Cleret Brasserie 地址:中環干諾道中62-63號中興商業大廈地下B舖 電話:2833 5667 營業時間:星期一至六:11:00-22:30