Tagged: fusion

0

【中西合璧紀念家鄉味道 傳統VS新派川辣出色】1935 壹玖叁伍

壹玖叁伍喺中環蘭桂坊附近嘅商廈開業大約半年,喺商廈19樓都有唔少捧場客。餐廳搵咗擅長煮外省菜嘅大廚坐鎮,點解老闆咁鍾情中菜?其中一個原因係老闆細個喺家鄉四川俾婆婆湊大,時不時都懷念家鄉味道。為咗紀念婆婆 ,仲用佢嘅出生年份(1935)為餐廳名命添!餐廳除咗有川辣菜式,仲有傳統同新派中菜。餐牌同餐具都參考西餐模式,例如湯類可以每位叫自己想飲嘅款式而唔需要叫一煲,令大家更舒服享受中菜。 中西合壁裝潢好優雅,同屋企人或閏蜜嚟都一定盡興。 想有私人空間仲可以包房,就算招呼公司客戶都一樣得體。 黃金淮山葵(HKD105)係天使與魔鬼嘅結合!淮山同秋葵都係健康嘅食材,口感本身亦冇咩特別,但沾上炸漿炸過後,再同炒到起沙嘅厚厚鹹蛋黃撈埋一齊,脆皮加上鹹香味真係冇得頂囉,話咁快就掃清一碟。 話明參考西餐上菜嘅排序,所以食主菜前可以先品嚐金絲和田玉(HKD135)清一清喉嚨。圓碌碌嘅冬瓜球以一串晶瑩剔透嘅白玉葡萄呈現,用瑤柱同鮮雞上湯熬到腍晒,入口爆汁,味道好清新。 鍾意辣嘅朋友有兩款菜係必試推介,水煮牛肉餅(HKD280)嘅香麻味令小編辣到有啲滴汗都仲追住食。佢嘅辣停留喺口腔,唔會落到喉嚨,加上爽彈嘅牛肉餅同吸晒湯汁嘅薯粉,真係好難唔愛上佢囉。 第二係川椒香辣軟殼蟹(HKD225),比水煮牛肉餅再辣啲,但乾炒嘅感覺又唔同;最特別係軟穀蟹嘅炸漿唔係日式嗰種,啱啱煮起就食幾脆口,隔一陣食入面會變到啲似麵包嘅質感,亦冇油淋淋喎。 餐後梗係要食甜品,呢度仲中西混合添。花雕話梅雪糕(HKD55/位)係自家製雪糕,小編一食即刻打咗個震醒晒!原本以為雪糕係清香口味,點知一入口係好濃嘅花雕味,跟住話梅味湧埋出嚟。雖然嚇咗嚇,但慢慢食又幾正喎,質感仲幾滑添。 呢度嘅cocktail唔單止飲得,靚到可以打卡!左邊Dragon Gossip(HKD60)主要用抹茶同開心果醬調製,味道幾清,不過同右邊1935beer(HKD60)相比就會甜少少。1935beer用薑啤加煉奶調製,但有薑啤中和所以唔覺得甜,男士都啱飲! 1935 壹玖叁伍  地址:中環威靈頓街2-8號M88威靈頓廣場19樓 電話:2156 1935 / 9858 1565 營業時間:星期一至日:12:00-15:00,18:00-23:00

0

【溫室主題好啱feel 中西合璧fusion菜】Greenhouse

銅鑼灣時代廣場食通天入面嘅Greenhouse,餐廳環境充滿「綠氣」,以溫室主題做室內設計,喺度食飯特別有feel,約埋成班friend搞個飯局,有啲似喺後花園開party嘅感覺!Greenhouse除咗環境有特色,食物賣點係「西方風味亞洲菜」,簡單嚟講即係fusion菜,其中幾味招牌菜仲好受歡迎添。 雞蛋仔配西班牙火腿(HKD88)近幾年香港咩古靈精怪雞蛋仔都出過,但呢個配搭都算新奇,地道街邊小食配高檔火腿?估唔到原來又夾得到!鍾意試新奇有趣嘅你絕對可以試吓呀。 泰式辣牛煎蛋飯(HKD128)泰式風味嘅主菜都做得好有水準,撈飯食一流。 冬蔭功龍蝦羅勒薄餅(HKD238)唔想食飯可以選擇食pizza,飽肚又好味。冬蔭功味唔算好重但整體算不錯! 香蕉配巧克力多士(HKD78)Greenhouse嘅點品一直係高質保證,花款又多。細細份過吓口癮又得,細食都食得落。   Greenhouse 地址:銅鑼灣勿地臣街1號時代廣場食通天10樓1004號舖 電話: 23834022 營業時間:星期一至日 11:30-23:00

0

【牛頭角風味小店 創出新派意韓飯卷】Koretaly

韓國餐廳喺香港遍地開花,尤其係近年韓流大行其道,韓式餐廳愈開愈多。最近小編發現連滿布車房嘅牛頭角定業街都有間隱世韓意式組合既「 Koretaly 」,主打韓式飯卷Kimbob,將傳統韓國食物與意大利烹飪融合,帶俾大家意想不到嘅體驗。 大家都應該好奇點解會將韓式食物同意大利菜式融合一體,等小編話你知啦。原來源自餐廳兩位主廚,其中一位有10年意大利菜式烹飪經驗,另一位係韓國人,從事飲食行業多年。將韓意結合係 Koretaly 經營理念,佢地想俾客人唔同體驗,嘗試新味道。 韓式飯卷Kimbap有六款口味:芝士、豬肉生菜、吞拿魚、肉腸、蟹棒及西芹生菜,全部即叫即製。小編迫不及待試個團結飯卷(HKD42),睇下究竟係點團結法。原來內裏有醃蘿蔔、甘筍、肉腸、蛋同菠菜等配料,口感十分豐富,飯卷亦都包到實一實,一啖食落飯卷唔會散曬,真係好團結呀! 意式豬肉醬配韓式年糕(HKD48)意式調料搭配韓式食物夠曬特別,食年糕就怕煮得太軟無口感。呢個年糕出奇煙韌彈牙,醬汁辣中帶甜又好開胃。 小店不定時會製作多款富有特色甜品,Korea Green Tea Panna Cotta(HKD18)同樣結合咗韓國同意大利元素,極濃綠茶融合濃郁牛奶產生另一種清新感覺,口感似足布丁。 小店除咗有熱食意粉同韓式年糕供應,亦都有售賣韓國同意大利空運過嚟嘅罐頭雜貨,鍾意韓國、意大利菜式嘅你可以隨時將呢種味道帶返屋企! 店舖其實内有乾坤嫁!原來店舖後場有座位,可以容納20人左右。想喺度開Party都得啦! Koretaly 地址:牛頭角定裕坊14號地下 電話:3971 0888 / 5281 4949 營業時間:星期一至六:12:00-20:00 星期日或公眾假期休息

0

【觀塘工廈探秘 優雅西泰Fusion菜】Friendmily

為食嘅小編有時都幾貪心,一時想食西餐,一時想食日本野,甚至其他國家菜式。其實觀塘收埋收埋好多五花八門嘅美食。有間餐廳既可以食到西餐嘅精緻而當中又有一點點泰國異國風味,環境仲相當舒適,令到小編忍唔住走咗去試! 內裡裝潢玩味重,無論壁畫同埋擺設都各具時尚風格,聯想到餐廳負責人係一個創意同敢於突破自己框架嘅人。 一上菜,睇落同一般西餐嘅意大利飯無太太分別。原來,依個青咖哩虎蝦海鮮意大利飯(HKD148)用咗青咖哩取代一般西式嘅醬料,所以西式之中帶點泰國風味。青咖哩味道清香,加上微辣感覺,令海鮮嘅鮮味更為突出,加上青咖哩味道溶入每啖飯之中,食起上嚟有一種異國風情。 估唔到,西餐廳都有正宗泰串(HKD68/6 HKD128/12),味道仲唔比其他泰國菜館遜色!三種串燒都有陣陣香料味,而且各有特色,牛串牛味濃郁,雞串嫩滑,豬串爽口,單食已經十分滋味。 雖然做Fusion菜,但同時間正宗西餐都做得相當有水準,好似依個香焗帆立貝海鮮芝士墨魚汁麵(HKD148),所調製嘅墨魚汁比一般坊間濃郁,而且帆立貝海鮮添上沙律醬,令整道菜都充滿清新感覺。如果係鍾意食海鮮嘅人,絕對不容錯過。 Friendmily 地址:觀塘巧明街109號榮昌工業大廈5樓A室 電話:3708 8705