Tagged: IKEA

0

【IKEA限定抵食四寶丸含新品 實試鮮味三文魚鱈魚丸】平霸

相信大家對IKEA宜家家居嘅瑞典肉丸一啲都唔陌生,不過佢哋最近新咗三文魚鱈魚丸,仲set咗個期間限定四寶丸特惠價添。有抵食嘅嘢,平霸即刻出動去實測吓先! 今次平霸就去到IKEA九龍灣分店嘅堂食餐廳覓食,但去到嘅時候見唔到有新肉丸宣傳,要問店員先買到呢兩款新品。 呢款IKEA期間限定嘅四寶丸(HKD9/4粒)真樣冇網上宣傳擺得咁靚,只係以蕃茄醬汁墊底,面頭再放瑞典肉丸、雞肉丸、素菜丸同三文魚鱈魚丸四粒丸。不過賣相都係其次,試味道最實際! 唔使十蚊就試勻四款口味,口感掂唔掂呢?經典嘅瑞典肉丸(圖左)結實啲;雞肉丸(圖右)比較彈牙;而素菜丸(圖中)就偏向好腍身嘅蓉狀,豆味較重,配埋酸酸甜甜嘅蕃茄汁幾開胃。 講咁耐,依家試新出嘅三文魚鱈魚丸喇!不過小編叫咗三文魚鱈魚丸伴蕃茄燴雜菜及薯蓉(HKD33)試真啲,因為有成6粒丸咁多,仲配咗一大堆雜菜同薯蓉,食落都好飽肚。 三文魚鱈魚丸外皮脆身又幾香口,一咬落去就有好香嘅三文魚味滲出嚟,鱈魚味相對上唔係好突出。不過佢嘅口感比較鬆散同乾身,但蘸埋跟餐嘅芝士醬一齊食就平衡返喇。 伴碟嘅芝士醬味道濃郁,除咗蘸肉丸之外,撈埋薯蓉食都好滋味㗎!   平霸小評:IKEA今次新出嘅四寶丸9蚊有4粒,啱晒有選擇困難症嘅朋友呀。雖然每款得一粒,但少少哋試勻晒都幾過癮㗎!而新出嘅三文魚鱈魚丸入面個三文魚味幾突出,夠鮮味,但就略嫌乾身咗啲。但伴碟嘅芝士醬有驚喜,咁嘅價錢都滿意㗎喇。   四寶丸 供應日期:即日起至5月30日(銅鑼灣分店:只限5月10日至5月13日) 供應地點:IKEA銅鑼灣分店、九龍灣分店、沙田分店及荃灣分店 三文魚鱈魚丸伴蕃茄燴雜菜及薯蓉 供應日期:即日起至5月30日 供應地點:IKEA九龍灣分店、沙田分店及荃灣分店 宜家家居餐廳及美食站 (九龍灣分店) 地址:九龍灣宏照道38號企業廣場5期MegaBox 4樓IKEA 電話:3125 0888 營業時間:星期一至日:10:30-22:30

0

【IKEA中式早餐好唔掂 燒賣硬膠牛肉球冇牛味】伏務台

IKEA嘅餐廳一向被譽為窮L天堂,無論係情侶定一家大細都咁啱,貪佢夠平又好食!最受歡迎兼好口碑一定係蔬菜薯餅同瑞士肉丸啦,小編都成日捧場喎!不過IKEA嘅早餐大家又試過未呢?有網民就話估唔到係伏,好!呢日小編就去咗得佢一間有得賣早餐嘅荃灣IKEA,睇吓乜料先? 難得一向以西餐為主嘅IKEA竟然賣中式嘢,一於試吓有冇伏! 中式點心拼盤(HKD23)總共有4款點心,分別有冬菇淮山豬肉燒賣2粒、山竹牛肉、潮州粉果同糯米卷各一件,價錢都算合理嘅。小編首先夾咗中間嚿粉果嚟食,夾起嘅時候感覺佢個皮好軟熟,有啲難夾,咬落口竟然有少少驚喜。雖然未至於超好食,但味道同出面茶樓嗰啲有8成似,內餡亦算足料,粉果合格啦! 粉果OK,點知試埋燒賣同山竹牛肉就出事喇,一咬落粒燒賣度就覺得……有啲膠膠哋,雖然食到咬落「索索聲」嘅馬蹄粒,但感覺只係一嚿包住馬蹄嘅粉糰。至於牛肉球呢,咬落去好似一嚿染咗色嘅麵粉咁,仲竟然有啲啲彈性……不過完全冇牛肉味呀,小編表示唔知自己食緊咩! 最後一嚿試埋個糯米卷,包住糯米塊麵糰有少少嚡,小編仲以為係黐住咗塊包紙囉!其實係冇!糯米就……黐笠笠咁,中間啲花生冇味冇道,總之唔好味! 幾粒點心點會咁易填飽肥仔嘅心靈呢?小編追加咗一隻糯米雞(HKD16),不過結果係同糯米卷一樣,啲飯黐笠笠又一嚿嚿,同埋中間嘅餡太鹹,認真唔太掂。   小編伏氣:雖然都明廿幾蚊係唔可以要求有好高質嘅食物,不過既然IKEA平時嘅西餐係咁有口碑㗎嘛,小編勸大家最好都係避開佢啲中式嘢喇,留返個肚食多塊薯餅同肉丸好過!   中式點心拼盤 入伏點:荃灣IKEA 入伏價:HKD23 糯米雞 入伏點:荃灣IKEA 入伏價:HKD16 中伏by #肥仔文 美術by #mui mui 攝影by #肥仔文 《伏務台》星期一伏務大眾,歡迎各界報料。