Tagged: salad

0

【玩爆食物名 勁搞鬼文青cafe】聚福樓 Joy Food Lounge

想輕輕鬆鬆食返餐,小編有好介紹!就係屯門嘅聚福樓啦,睇名以為係茶樓?唔係喎,其實係一間Lounge嚟。事源店主岳父曾經喺澳洲開過一間餐館叫做聚福樓,加埋Joy Food Lounge做英文名夠晒大反差,又突顯到小店大玩Fusion嘅特色! 店外嘅一棵大樹係佢地嘅標記,好多人嚟到都會打一打卡先㗎。 店內嘅裝飾都係店主去旅行嘅時候搜集返嚟,都係圍繞住大自然做主題。 店主係一個好鍾意玩嘅人,所以菜式名全部都改到好搞鬼!小豬仔好慢好慢咁去打排球(HKD228)就係燒豬肋骨啦。豬肋骨經過慢烤,已經全部離骨,食落好滑,順帶一提,底下果啲係蕃薯條嚟㗎。 聚福樓大晒健康沙律(HKD138)香港人飲食習慣都係偏向多肉少菜,就咁食個沙律已經算健康。不過呢個沙律將健康升多級,有埋杞子、藜麥、燕麥等等多種健康食材,仲配埋乳酪比你添! 炸炸諦!蕃薯仔(HKD88)甜甜嘅炸蕃薯條,本身已經夠晒得人鍾意,再加埋廚師特別調製嘅芝士醬,香草同杏仁,食落加倍脆口同惹味! 窩夫甜甜(HKD128)自家製雜莓醬配埋鬆軟窩夫,再加埋人氣Mövenpick焦糖雪糕,幾樣野交織埋一齊,真係甜到入心。 提提你,逢星期四仲可以嚟聽下人地唱Live,加倍享受呢一餐添! 聚福樓 Joy Food Lounge 電話:9751 3386 / 2362 6968 地址:屯門青善街28號康景花園地下1號舖 營業時間:星期一至日:11:30-10:00

0

【點配搭自己話事 上環小清新輕食飯卷】Pokéworld

位於上環嘅輕食小店Pokéworld,主打自己組合輕食。嚟到大家可以揀沙律、壽司卷或者飯做底,再逐一選擇食材、醬汁同配料為自己打造專屬食物!樣樣食材都可以自己配搭,食材又夠晒新鮮,想唔啱食都幾難! Pokéworld以天藍色同白色為主調,喺芸芸小店之中,額外顯得清新。 店內同樣以天藍色同白色為主調,白色予人非常乾淨簡約嘅感覺。 嚟到Pokéworld開餐,大家可以自由組合自己成個輕食,可以揀飯、沙律或者壽司卷做Base㗎!自己組合嘅過程一共有5步曲,包括有:Base、主菜、醬料、小食、配料同配菜,樣樣食材都好新鮮,仲可以自己揀埋素唔素食添! 呢度仲有好多款食材選擇,除咗有海鮮之外,仲可以揀全素添!店員會根據你所選擇嘅配料,喺你面前舀起材料,成個過程一清二楚㗎! 壽司卷(沙律)做Base配埋挪威三文魚同吞拿魚(HKD78/2勺),另外再加上玉子(HKD6),食落非常清新,魚肉極之新鮮,配埋清爽蔬菜感覺好輕盈,份量啱啱好,食完返工唔駛驚飽得滯會眼瞓。 想食得豐盛啲,仲可以揀飯做Base,配埋吞拿魚、三文魚、熟蝦、帶子、豆苗、青瓜、紫菜、彩虹蟹籽同埋中華沙律等等不敗配搭,食完一次好想返轉頭再試埋其他配搭! Pokéworld 電話:2811 2115 地址:上環禧利街8號地舖 營業時間:星期一至五:11:45-21:00 星期六及日:12:15-20:30

0

【有營之選!直送健康沙律】Cadobox

「養生之道,莫先於食。」利用食物嘅營養價值嚟防治疾病,唔單止可以促進健康長壽,亦可以補養臟腑功能。香港人愈來愈注重健康飲食,沙律亦慢慢多人接受取代主食。如果你係沙律嗜好者,咁專賣沙律嘅Cadobox實滿足到你!Cadobox現時只提供外賣服務,只送貨到中環、上環同金鐘。佢地服務相當細心,大家可以通過Facebook,Whatsapp同E-mail輕鬆落Order!而且Menu每日都會更新,一定唔會悶親你,你只係需要早一日或者即日1430前落單就可以啦!不過當然唔好咁趕啦,因為佢地嘅沙律好受歡迎,遲啲落單可能已經賣晒無得揀啦! Summer Chicken Salad(HKD65)材料好豐富,而且樣樣營養價值都十分之高。有羊乳酪、松子、杏仁、蜜瓜、藜麥、菠菜、雞肉、薄荷葉、櫻桃番茄。每一粒藜麥咬感十足,藜麥蛋白量係大米兩倍,又含有鈣、鎂、B同E族維生素,營養價值豐富。進食時再淋上檸檬蜂蜜,讓沙律不至於無味道之餘、卡路里唔會因添加醬汁而暴升。所有用料都好新鮮,醬汁份量適中,調味唔會蓋過食材本身清甜味道。 如果鍾意食蔬果,可以試下Mandarin Orange Quinoa Chicken Salad(HKD65)材料同樣好多,有杏仁、柑橘、藜、菠菜、雞肉、薄荷葉、櫻桃番茄。水果富可溶性纖維,可改善人體消化系統。不過要留意,小編今次食到嘅沙律都係咁啱咋,佢地menu日日都唔同,想食就要留意佢地今日有乜餐啦! Cadobox 網址:http://www.eatcadobox.com/