Tagged: #tea set

0

【泰式半自助午餐任食沙律吧 主菜首選$88足料船麵】象屋泰國餐廳

要食得抵又多選擇?旺角象屋泰國餐廳嘅泰式半自助午餐一定啱你,自選泰式主菜(HKD88起)有9款,船麵、燒豬頸肉飯、肉眼扒等等都好受歡迎;仲包埋任食嘅鹹甜點泰式沙律吧,即刻睇吓有幾正啦! 餐廳環境都充滿泰式感覺,12:30左右就開始有食客嚟喇。 如果食半自助午餐,可以喺9款主菜之中揀1款,仲可以任食沙律吧長枱上約15款食物,有泰式木瓜大蝦沙律、椰汁糕、春卷、咖喱角等等。如果淨食沙律吧(HKD79)都可以,同半自助午餐一樣會跟杯茶或咖啡。 食得泰國菜梗係有牛肉船麵(HKD88),亦係9款主菜之中最抵嘅。牛腩同牛丸分量幾多,煮得好入味。湯底香濃唔會太鹹,麵仲好似粉絲咁嗦晒湯汁添。 如果想食炒麵,泰式雞肉金邊炒(HKD93)唔會炒到乾晒,幾香口惹味,唧埋青檸汁就更加濕潤易入口。雞肉大大粒但依然嫩滑,肉量都唔少添。 如果你鍾意食牛扒,不妨試吓少有嘅美國肉眼扒配薯菜及羅望子汁(HKD148)。肉眼扒烤焗後淋上酸甜惹味嘅羅望子汁,食晒都唔覺膩。加上炒到啱啱熟嘅椰菜仔,爽口得嚟幾fresh㗎。 如果食唔到午餐,呢度嘅晚市小炒、甜品同下午茶都一樣吸引。好似呢款辣椒膏炒大蜆(HKD148),肉質嫩滑彈牙冇咩沙,辣度適中惹味唔會蓋過蜆嘅鮮味。 不過香芒黑白糯米飯(HKD88)始終係泰式甜品首選,餐廳特別用透明外殼裝起大量椰絲同香甜多汁嘅芒果肉,打開外殼就會灑落黑白配嘅糯米飯,味道同打卡都係一流呀! 而星期六、日15:30-17:30新推嘅周末二人專享下午茶餐(HKD158)都同樣抵食。 兩碗椰香十足嘅青咖喱雞飯配上脆炸櫻花蝦、素春卷、蝦餅、一口芒果糯米飯、香甜嘅斑蘭撻同榴蓮味濃郁嘅榴蓮撻6款鹹甜小食;加上兩杯咖啡或茶,啱晒鍾意香口食物嘅你,食晒都飽肚㗎。   象屋泰國餐廳 地址:旺角太子道西193號MOKO新世紀廣場4樓453號舖 電話:2386 6882 營業時間:星期一至日:11:00-22:00

0

【日山和牛貫穿全日Menu Chill歎精緻西日下午茶】Gosango

鍾意食和牛嘅朋友要留意銅鑼灣開張無耐嘅Gosango,佢哋由單點款式、下午茶、Happy Hour到晚餐都用日本頂級和牛「日山和牛」滲入唔同菜式,仲有睇得又飲得嘅Cocktails同Mocktails,無論平日定假日嚟都正喎。 餐廳設計時尚摩登,但隱隱有日式風味嘅感覺。 單點菜式之中有兩款用咗日山和牛,日本和牛漢堡(HKD188)肉味香濃,配埋秘製醬汁就更加惹味! 另外,和牛肉醬闊麵(HKD168)口感好飽滿,配埋脆米餅令層次變化多啲添。 想light啲可以試吓蟹肉天使冷麵配櫻花蝦雞清湯(HKD158),味道鮮甜又唔會滯。 行到攰攰哋,可以試吓有齊鹹甜點嘅精緻下午茶套餐(HKD288/兩位)。自家製橙味英式鬆餅配自家製淡忌廉藍莓果醬、蟹肉脆餅、鮮蝦多士、日山A5和牛蕃薯餅、意大利芝士杯、檸檬撻、綠茶茉莉花雪糕同榛子閃電泡芙款款都咁吸引,飲品可以點茶或咖啡。 呢度晚餐好特別,只係供應呢款小食拼盤套餐(HKD188/位,HKD368/兩位),跟餐可以喺指定嘅特選無酒精雞尾酒揀一杯飲品。九宮格入面有脆炸豆腐配土佐醋汁、日山A5和牛壽司、鹽漬昆布沙律、海膽馬鈴薯沙律、日山A5和牛牛肋條、櫻花蝦餅、脆炸鱔乾、日山A5和牛迷你漢堡同日山A5和牛芝士春卷,唔覺意就試咗幾款用嘅菜式添。食過返尋味的話,每款都可以再追加(HKD48款)。 如果只係Happy Hour嚟飲杯嘢,只要點任何酒精飲品或Mocktails,都會免費送一個日山A5和牛迷你漢堡。左邊嘅Mocktail就係Mid-Summer(價錢待定),將菠蘿、薄荷、蘋果、自製茶糖水同玫瑰完美結合,加埋紅莓雪芭幾fresh。呢度仲有一系列松本酒清酒Cocktails,右邊夢幻紫色嘅松(價錢待定)就用松本清酒、藍花糖漿、巨峰提子同薄荷調製,再以食用花做點綴。呢度仲有多款手工啤酒同日本精品清酒可以揀添。   Gosango 地址:銅鑼灣謝斐道535號Tower 535 1樓 電話:2885 0533 營業時間:星期一至日:11:30-00:00 菜式供應時段: 單點菜單:11:30-18:00 精緻下午茶套餐:14:30-17:30 小食拼盤套餐:17:30-00:00 歡樂時光:17:30-19:30

0

【賀年純素下午茶逐層歎 揀埋糕點禮盒健康新口味】素學堂

話咁快又過年喇!迎接豬年,今次素學堂去咗呢間The Cakery蛋糕店,呢個土炮嘅蛋糕品牌,一直以天然同營養豐富食材為賣點,炮製出多款健康嘅蛋糕同甜品。最近仲推出咗素食下午茶同各種精緻嘅賀年禮盒添,歎住下午茶又可以揀返件啱心水禮盒,送禮啱晒啦! 首先登場係純素下午茶(HKD538),上層有純素鮑魚撻2件。 中層係Omnipork純素豬肉餃子、Omnipork純素豬肉蓮藕餅同素蘿蔔糕各2件。 下層就分別係紅糖同黑糖味年糕、紅棗糕2件、點心造型迷你杯子蛋糕2件和同金元寶朱古力2件,仲配埋純素XO醬添。三層嘅竹籃擺設又幾有新年feel喎,真係睇得又食得!呢個純素下午茶供應到2月28日咋,仲要喺利園分店先有,想試就記得早一兩日預訂喇! 其中有幾款糕點食得仲買得,首先就係充滿新年氣氛嘅紅色禮盒包裝年糕(HKD218),分別有前面嘅紅糖同黑糖口味,小編就鐘意後面嘅黑糖味多啲,口感煙韌又有甜甜黑糖味,如果怕太甜,咁紅糖味都唔錯㗎! 小編最鍾意紅棗糕(HKD228),有啲杞子喺紅棗糕裡面,食落有少少煙韌但唔會黐牙,而紅棗嘅香味同甜味就好似濃縮咗喺糕度,不過放心唔會太甜,小編覺得好適合新年一家大細咁食! 呢個咁迷人嘅粉紅色禮盒,裡面係黑松露純素蘿蔔糕(HKD238),味道就多咗黑松露嘅香味,感覺都矜貴啲咁喎,不妨一試呀! 如果唔想送糕點做賀禮,呢個年年有魚禮盒(HKD438)都唔錯㗎!一打開禮盒,就會見到由一瓶瓶果醬排列而成嘅兩條錦鯉活現眼前,幾咁精心設計喎。 禮盒裡面有2樽以天然糖代替精製糖嘅手工果醬,分別係150克嘅紅棗醬同150克嘅橘子醬。之後就有以牛蒡同冬菇特製嘅純素XO醬(110克),最後就有一樽有肉嘅XO醬。 最吸睛嘅壓軸出場喇,就係豬光寶氣有機翻糖曲奇禮盒(HKD388),裡面總共有6件曲奇,都係以天然糖代替精製糖,可以增加不飽和脂肪,咁就可以減少罪疚感咁盡情享用啦!一系列咁得意嘅曲奇真係好可愛㗎!有錦鯉、京劇臉譜、可愛小金豬同金元寶等等,真係好有心思喎!咁有新年氣氛,送禮俾人一定有驚喜!溫馨小提示,如果想訂糕點同禮盒,最好打電話去門市問清楚仲有冇貨先呀,無謂白走一場啦!   The Cakery(利園分店) 地址:銅鑼灣恩平道28號利園二期1樓124號舖 電話: 2816 1838 營業時間:星期一至六:10:00-19:30,星期日及公眾假期:10:00-19:00

0

【人氣網店開到實體店 抹茶tea set嚐盡甘甜苦】瓜破菓子店

唔知大家有冇發覺,好多甜品師傅都係男士呢?人氣蛋糕店瓜破菓子店都唔例外,老闆阿禧好鍾意日本文化,日本甜品係咪超晒班?「日本製作甜品嘅水平都幾高,除咗可以學到主流整法式甜品嘅技巧,仲有和菓子同其他類型嘅甜品。」阿禧學成返嚟就喺2012年先開網店,經過6年時間終於喺葵涌有實體店,不過仍然以預訂單為主要方向。堂食就不定時更換甜品款式,一場嚟到,小編先試主打嘅抹茶tea set,再試件裝款式啦! 店舖只有5個位,所以會以外賣為主打。 阿禧喺現場後製各款甜品,每個步驟都好仔細㗎。 抹茶尽し(HKD88)有6款,俾大家食到抹茶唔同嘅味道,點解咁講?「有啲客人食完都會話唔夠抹茶味,唔夠苦,不過我哋都係想攞到平衡嘅感覺囉。抹茶嘅甘、甜、苦等等味道都會喺呢個set入面品嚐到,同時可以試到唔同嘅質感。」 呢碗仔底有抹茶慕絲,面有團子、蜜柑同紅豆。微甘嘅抹茶慕絲淋咗蜜糖之後會慢慢出水,所以要快啲食。 抹茶白豆蓉係幾款之中小編覺得最甜嘅,同埋帶啲豆香。脆餅點少少嚟食已經好有味喇。 抹茶松露朱古力真係俾你食到抹茶嘅甘苦味。質感好滑,入口就化開,好正! 呢個黃豆脆餅有啲硬,但烘烤過嘅香味好吸引人。抹茶醬質感有別於平時嘅果醬,好流質,味道偏清新,同黃豆脆餅好夾! 清甜嘅抹茶蛋卷都深得小編歡心,蛋糕好鬆軟,濕潤唔乾;抹茶忌廉輕輕加強抹茶嘅甘香。 抹茶班戟都令人充滿驚喜!當你以為只係包住忌廉芝士同抹茶忌廉嘅時候,仲有粒甘甘哋嘅抹茶啫喱喺中間呀!試完咁多款,小編都體會到阿禧嘅苦心,唔同嘅質感配搭真係突出咗抹茶最細膩嘅味道,又同時食到多元化嘅甜品喎。好,跟住小編要攻陷餅櫃喇! 當日小編12點去到,見餅櫃銷情唔錯,不過阿禧都有啲無奈咁講:「依家開業初期,好難掌握商場人流,所以餅櫃每日大約有8-9款件裝蛋糕,每款4-5件啫。因為有時4點左右會賣晒,有時收舖又剩好多。不過賣晒都仲有堂食甜品同繼續接預訂單,因為工場喺附近。」。小編都幾好彩,下面試嘅2款cake嗰頭食緊,呢頭就賣晒喇! W(HKD42)係有2款芝士嘅芝士杯,面層係軟滑芝士cream、中間係忌廉、底層係焗過嘅芝士粒拌餅乾,一吓潷到落底就可以食到三層口感。小編本身唔係芝士愛好者都覺得幾好味,芝士唔膩又鹹淡適中,食晒成杯都唔會覺得滯喎,難怪受大家歡迎啦。 薑(HKD36)由開店到依家都係熱賣款式,杏仁撻底有淡淡清香,唔似牛油餅皮咁易散開。中間嘅檸薑忌廉質感有少少似吉士,因為比平常忌廉厚啲,不過仍然好幼滑;入口真係有陣薑嘅辣味,加上檸檬嘅酸味更容易品嚐到當中嘅甜,所以味道相對濃啲。蜜蜂仔用白朱古力而成,唔太甜亦唔會搶咗撻嘅味。 仲有自家製曲奇可以買走,款式好多元化喎。 瓜破菓子店 地址:葵涌葵昌路72-76號活@KCC 4樓409號舖 電話:2135 6705 營業時間:星期一至日:11:30-20:30(截單時間:19:30)

0

【女強人棄高薪賣素蛋糕 無麩質Tea Set鹹甜都正】素學堂

小編同朋友食Tea,最怕食完成set甜品蛋糕之後會好膩,所以今次介紹一個唔會甜死人嘅素cake tea set。The Cakery喺置地廣場同利園二期都有店舖,以為係集團式經營,原來老闆係一位放棄任職十年銀行高位嘅女強人Shirley。點解有咁大轉變?最初Shirley只係玩票性質整吓蛋糕俾自己囡囡食,點知連朋友、客戶試過都大讚,更有相熟嘅家長客戶問佢唔知知邊度有純素蛋糕賣添,慢慢搞到佢整餅興致愈來愈大,最後索性開店,仲要係開一間素蛋糕店整無麩質蛋糕,目的想幫到對蛋奶麩質敏感嘅小朋友!Shirley為開店,親自研究同設計各種蛋糕款式,佢話見到客人食得好滋味嘅滿足感係做銀行感受唔到嘅!今次小編就去利園分店試吓佢嘅蛋糕啦! The Cakery有兩款Tea Set,當中嘅cupcake可以自己揀款式。Cupcake可以單買,兩間店會每日轉唔同款式。不過要留意部分蛋糕係純素、部分只係無麩質,而有少量會有肉嘅餡料。 小編試咗呢款有鹹有甜嘅純素Tea Set(HKD388/2人用),每日14:30-18:00期間供應,不過純素Tea Set要提早一日預訂㗎!成個Tea Set有10款食物,食完感覺飽得嚟唔頂胃,小編就最鍾意呢幾款: No.1係頂層左邊第二件嘅Salted Caramel Popcorn,迷你一口cupcake面頭嘅爆谷落咗海鹽焦糖,少少鹹唔會好甜都幾提味。蛋糕口感鬆軟幾濕潤,配冇奶忌廉,感覺唔會好heavy。 No.2係Scone,無麩質鬆餅質感比平時食到嘅厚實啲,但唔會硬同乾。拎上手唔會一手油,配冇精製糖純素士多啤梨果醬紅桑子果醬,一口一件再飲啖素奶咖啡(Tea Set包兩杯茶/咖啡)係絕配呀! No.3係兩款惹味開胃鹹點,Sweet Potato Quinoa Bite同Mini Pizza。素蔬菜撻有滿滿嘅紅菜頭酸青瓜,撻底好脆,餡料有天然清淡嘅甜味,配埋面頭微酸嘅醃菜絲好開胃;而Pizza嘅麵包餅底都係自家工場製嘅純素餅底。 小編另外都試咗兩款純素cupcake,左邊嘅Day Dreamer(HKD45)係其中一款最受歡迎嘅朱古力味cupcake,加咗奇亞籽代替蛋做黏合效果,口感依然好濕潤軟熟。面頭係Dairy Free Cream,唔算好甜。 另一款小編推介嘅係Apple Crumble(HKD45),蘋果金寶係好多女士喜愛嘅甜品,但以cupcake方法整一樣好正喎!蘋果餡唔算多但好足味,食落有陣好香嘅肉桂味同焦糖香㗎!   The Cakery 地址:銅鑼灣恩平道28號利園二期1樓124號舖 電話:2816 1838 營業時間:星期一至六:10:00-19:30,星期日及公眾假期:10:00-19:00

0

【母親節帶住阿媽去食cake 4款下午茶應節驚喜】Ask、DOUX、Tea WG、GREEN

其實同媽媽慶祝母親節都係想佢開心啫,不如就帶媽媽去High Tea歎吓,重溫少女情懷又得,做吓貴婦又得啫!小編搵咗4間唔同風格嘅餐廳俾大家,今個母親節一於俾個驚喜媽媽啦! 悠閒文青 以往小編絕對唔敢諗會入到陽明山莊食嘢,但依家你同我都有機會喇!不過唔好誤會,係去上環文青feel嘅Ask cafe就得喇,因為佢哋嘅cake係由陽明山莊嘅會所提供。今個母親節仲有Special Menu,俾個機會媽媽食正嘢啦! Ask有唔少Fusion菜式,母親節Special Menu(HKD180/set)都唔例外,前菜有鹹點日式無花果凍豆腐,味道幾清新;母親節橙汁特飲加咗少少酒,味道唔會好甜。 主菜士多啤梨汁煎龍脷柳意粉有淡淡嘅甜味,同濃濃嘅芝士撈埋都幾夾,仲有煙肉粒增加口感。外脆內嫩嘅龍脷柳都幾厚肉,分量十足! 重點嚟喇!甜品可以3選1,由濃味到清新嘅分別係左邊帶少少酒味嘅Macadamia Nut Brownie、中間微酸醒胃嘅Raspberry Mousse同右邊最清甜嘅Strawberry Mousse。 點選母親節Special Menu仲會額外送上充滿牛油香,又鬆軟嘅限定曲奇。 另外都有Afternoon Tea Set(優惠價HKD198/原價HKD238),三層款式由蛋糕到小食都有,當然蛋糕都係由陽明山莊嘅會所提供啦。兩杯飲品可以揀咖啡或茶。 蛋糕款式視乎當日陽明山莊會所供應邊款,去到先知,不過質素一定有保證。  小食有4款,爽口鮑魚、濃味吞拿魚多士、脆炸雞翼同香草三文魚,輕食吓都唔錯㗎。   Ask 地址:上環皇后大道中202號The Putman地下A號舖 電話:2677 1131 營業時間:星期一至五:08:00-20:00,星期六:11:00-20:00   可愛藝術家 想食完Tea方便行街可以去旺角嘅DOUX,佢哋嘅甜品設計得好cute又鬼咁靚,食落肚滿足眼福加口福啦。 Honey comb(HKD98)用蜂蜜檸檬芝士奶酪慕斯同蜂蜜軟糖做主料,鍾意甜食嘅朋友不妨一試。 Berry’s(HKD108)口味酸酸甜甜,因為用草莓同野莓整成,加埋白芝士慕斯,口感幾滑。...