Tagged: times square

0

【食餐好慰勞屋企人 正宗上海菜卅年精粹】上海小南國1987

小南國1987年上海開設第一間店舖,15年前喺香港開立第一間分店,真係唔講唔知原來佢已經開左一段好長嘅日子。可以做到今時今日,食物當然有一定水準,不論同親朋好友或者招呼客人食飯都絕對唔失禮。位於時代廣場食通天嘅分店最近都已經裝修完畢,為慶祝開立30週年,以全新升級形象「1987小南國」同大家見面。 裝修之後餐廳環境變得非常有格調,仲有獨立間格圓檯,坐得更舒適! 位置咁方便,週末好多人都一家大細嚟歎返餐高質上海菜。 冷菜拼盤總共有7款可以任選4款:特別推介秋葵拌木耳/紹興花雕醉雞/本幫糖醋小排/老醋海蜇頭(HKD198)唔好以為望落去細細份,其實份量都唔少! 薺菜馬蘭頭乾絲(HKD58)薺菜同馬蘭頭香港人聽落可能會比較陌生,因為唔係廣東人一般會食嘅菜,但係佢地原來係南方人好普遍嘅養生菜!尤其係馬蘭頭,對高血壓同喉嚨發炎都有幫助。 金網生煎窩貼(HKD58)非常吸睛!除左靚之外,保證有內涵,一咬落去即刻爆出濃郁高湯,要小心食啊。 揚州雞火煮乾絲(HKD98)係傳說中乾隆皇帝都食過嘅名菜,底部個清雞湯完美配合一絲絲豆腐乾同爽口蝦仁。 餐廳一定要有返咁上下功力先可以將平平無奇嘅伴麵做得好食!呢份南國蔥油開洋拌麵(HKD48)果然無令我失望。 最後當然要食埋個甜品啦,抹茶水晶糖不甩(HKD48),晶瑩剔透嘅外皮加埋花生芝麻粒粒,口感好豐富呀! 上海小南國1987 電話:2874 8899 地址:銅鑼灣勿地臣街1號時代廣場11樓1103號舖 營業時間:星期一至日:11:30-15:00;18:00-23:00

0

【即影即印即飲】Selfie Café

將食用印刷技術套用喺食物同飲品上面,已經唔係啲咩新鮮事。日、韓、新加坡都已經開左類似嘅cafe嫁喇!最近Selfie Café靜靜開切喺銅鑼灣時代廣場8樓,試業當中,黎緊6月尾終於都grand opening。有新野當然要介紹下俾大家啦! 雖然樓層係高左啲,但係非常容易搵到。 少女公主風嘅裝修,啱哂班熱愛自拍閨密或熱戀情侶黎潮聖下! 將相片印埋落蛋糕,馬卡龍都得,產品種類都頗多! 要即場印落飲品上面,首先要下載Selfie Café專屬app,然後上載靚相就可以嫁喇。做法非常簡單!可以即場影張selfie,或者用手機入面任何相片都可以嫁。 TFFF就當然即刻試下印個logo落去玩下先啦。印出來質素好好,唔會蒙!影相影左差不多10分鐘都未化開。墨水通過美國最高食物安全標準FDA同多個國際食品安全衛生組織認證,非常安全可靠,唔會對身體有害。加10蚊仲可以將個Selfie Café瓦杯攞返屋企添! 試左奶霜極品頂級烏龍皇(HKD59)同芋之誘惑(HKD59),如果唔想印到成口都係食用色素,可以問店員攞飲筒插入去由底開始飲返上黎。唔好以為依啲飲品搞綽頭得個樣,名副其實好頂級,奶好滑,茶又夠香!下次行街行到攰想搵個地方靜靜地飲返杯野坐下,不妨一試Selfie Café。 所有馬卡龍都有禮盒裝,每一粒都可以印唔同相片。想氹小朋友,另一半,親朋好友話都冇咁易!(此圖片由Selfie Café FB專頁提供) 婚宴回禮想送特別啲,將自訂套案或者相片印落棉花糖又得!(此圖片由Selfie Café FB專頁提供) Selfie Café 銅鑼灣勿地臣街1號時代廣場8樓Kiosk 星期一至日: 11:00-22:00 www.selfiecafe.hk