Tagged: waffle

0

【玩爆食物名 勁搞鬼文青cafe】聚福樓 Joy Food Lounge

想輕輕鬆鬆食返餐,小編有好介紹!就係屯門嘅聚福樓啦,睇名以為係茶樓?唔係喎,其實係一間Lounge嚟。事源店主岳父曾經喺澳洲開過一間餐館叫做聚福樓,加埋Joy Food Lounge做英文名夠晒大反差,又突顯到小店大玩Fusion嘅特色! 店外嘅一棵大樹係佢地嘅標記,好多人嚟到都會打一打卡先㗎。 店內嘅裝飾都係店主去旅行嘅時候搜集返嚟,都係圍繞住大自然做主題。 店主係一個好鍾意玩嘅人,所以菜式名全部都改到好搞鬼!小豬仔好慢好慢咁去打排球(HKD228)就係燒豬肋骨啦。豬肋骨經過慢烤,已經全部離骨,食落好滑,順帶一提,底下果啲係蕃薯條嚟㗎。 聚福樓大晒健康沙律(HKD138)香港人飲食習慣都係偏向多肉少菜,就咁食個沙律已經算健康。不過呢個沙律將健康升多級,有埋杞子、藜麥、燕麥等等多種健康食材,仲配埋乳酪比你添! 炸炸諦!蕃薯仔(HKD88)甜甜嘅炸蕃薯條,本身已經夠晒得人鍾意,再加埋廚師特別調製嘅芝士醬,香草同杏仁,食落加倍脆口同惹味! 窩夫甜甜(HKD128)自家製雜莓醬配埋鬆軟窩夫,再加埋人氣Mövenpick焦糖雪糕,幾樣野交織埋一齊,真係甜到入心。 提提你,逢星期四仲可以嚟聽下人地唱Live,加倍享受呢一餐添! 聚福樓 Joy Food Lounge 電話:9751 3386 / 2362 6968 地址:屯門青善街28號康景花園地下1號舖 營業時間:星期一至日:11:30-10:00

0

【脆皮包住煙韌心 正宗比利時列日窩夫】Waffleman

每次去旅行都會歎盡當地美食,貪煮法夠地道吖嘛!小編未放到假,等我去香港最有海外渡假feel——赤柱,尋覓特色甜品,俾自己放鬆心情享受今個週末。 Waffleman店主Wendy去比利時旅行一嚐列日窩夫,就即刻愛上個種外面脆得嚟裡面又煙韌嘅口感,於是專登喺比利時學師返香港開舖,比更多人可以品嚐到呢款美食。 想更加有慢活悠閒嘅感覺?唔需要付出更多,攞住件窩夫同飲品,坐係店外露天茶坐,眺望碧海藍天,吹吹海風,已經好似置身歐陸小鎮一樣。 列日窩夫(Liège waffle)同一般窩夫質感之所以唔同,因為唔似英式或美式窩夫用蛋漿烘烤,而係用麵糰!麵糰經過發酵令窩夫質感更加紮實綿密,窩夫内嘅比利時珍珠糖烘烤之後會有層焦糖衣,令窩夫表面更加脆。 抹茶味一直都係香港人熱選口味之一,焦糖抹茶窩夫(HKD42)一定必試。新鮮烤好嘅窩夫「熱辣辣」,即刻放棉花糖、焦糖漿凍冰冰嘅抹茶雪糕喺上面,入口冷熱交替嘅感覺好刺激呀。 鍾意再甜少少又想食cake,可以試朱古力新地朱古力批(HKD33),批底似加咗曲奇嘅蛋糕,質感幼滑,甜度適中絕不封喉。 如果怕太飽肚,可以揀選朱古力曲奇草莓雪糕三文治(HKD25),係曲奇面灑上糖霜點綴,夾住清甜嘅草莓雪糕令曲奇質感更加鬆軟,份量啱細食嘅你或者小朋友都得。 Waffleman 電話:3488 2797 地址:赤柱廣場407號鋪 營業時間:星期一至五:11:00-19:00 星期六日及公眾假期:10:30-20:00

0

【人氣必食雪糕「蕃」外篇】Smokey Ice

SMOKEY ICE既大名,深信係雪糕界已經享負盛名,無論佢之前推出既「鐵板雪糕牛扒」定「雪糕炸豬扒」,本身好食之餘,仲可以自拍黎呃下LIKE,絕對係外內兼備既頂級雪糕,但老闆當然唔會固步自封,不斷創新,令到顧客享受更多快感。絕對係雪糕界既創意達人! 招牌用咗霓虹光管,簡單粗線條而簡單突顯雪糕店美式既風格。而紫藍既用色都突顯SMOKEY ICE本身帶有玩味既感覺。 而店舖內牆身和桌椅都用黑白色為主打,希望帶街頭一點既味道出來,令顧客黎到都不會太拘束,隨意一點。 SMOKEY ICE其中一樣主打特色係依個夢幻雪糕杯(HKD40-46)啦!本身杯底放左乾冰,既保持雪糕冷凍既溫度,而且同時令到雪糕向上噴煙,營做出夢幻既特效。仲有!見到啲味道都知唔係一般雪糕,除左有坊間一般有既味道之外,仲有一啲獨特味道,例如:馬騮搣,菠蘿包等等,真係驚喜一浪接一浪! 如果食過之前味道仲未滿足既話,依個新出既北海道鮮茄味雪葩(HKD46)就岩晒大家,除咗杯雪糕仙氣爆滿之外,佢仲選取左北海道蕃茄直接磨成溶整成雪葩,食落去酸酸甜甜,夾雜住蕃茄肉,感覺似沙冰,係炎炎夏日之下透心涼。 心諗,點解一間西式既甜品舖會有港式腸粉,望真啲,原來係好似係‧腸粉套餐(HKD58),「腸粉」用椰子卷製成,而「魚蛋」就炸糯米糍,再加士多啤利,菠蘿同埋自家製豆腐味雪糕,一食落去,椰子夾埋朱古力醬味道濃郁,加上外脆內軟既炸糯米糍,最後食返生果平衡返,絕對係另一夏日消暑佳品。 除左甜品之外,佢地既小食都同樣出色,千島醬窩夫雞堡(HKD40)就係其中例子,窩夫取代本身漢堡包,多了一份鬆軟同口感,內裡雞肉透過油炸鎖住肉汁,令到雞肉依舊香脆多汗,再加上新鮮蕃茄同蔬菜,絕對係消閒小食中絕對好選擇。仲有,雞堡供應時間為下午茶時段(14:30-18:00)。 Smokey Ice (荔枝角分店) 地址:荔枝角長義街9號D2 Place 1樓101號舖 電話:6153 0309